Fotografia dje artistanan franses Pierre i Gilles

SIKOPATIA KOLONIAL -dediká na Jamaica Kincaid

Mas hende bo ke, pero biaheronan pa niun kaminda lo no keda.
Biaheronan rònt e isla, kontra bientu i olanan e temporada di
Karnaval akí, nabegando laman rònt mi nashon, nan lo no keda.
Biaheronan for di nòrt, establesiendo nan mes den e universo
krioyo akí, kon nan por keda? Paseantenan, ku nan manera
pekuliar den e mundu iresistibel akí, kon nan lo keda? Den
nan mundu komun sin choke, nan mes universo, nan legion
k’e spiritu di aparthèit, aki den esun di nos, nos realidat
ku peso, unda despues di hopi tempu finalmente un meskla
bon kabá a dal pega. Aki, kaminda spiritu ta balia tumba
i den sekretu ta adorá yakumeinchi, ainda, nada menos
nada mas, OK.?! Aki tin bishitantenan riba boto di bela,
rònt mi isla. Nan lo no keda. Nan no gusta nos, nan gusta
nan botonan, i nan ta haña ta bon pa mustra nos kabuya.
Mas hende bo ta bisa, pero wak rònt e tera turístiko akí,
mira laman, kosnan straño, biaheronan pa niun kaminda
nabegando nos laman ku bark’i bela, sin karni pa régenbog,
pa régenbognan ku ta fushoná, sin kurason pa ritmonan veras.
Weta botonan di bela rònt mi isla nèt ora di fiesta, vislumbrá
kriaturanan birando kòrá, separá, skapando riba nan boto
di bela p’e shelunan di Shangri-La, turesten nos ta biba
na nan man, den un mundu band’i nan. Aki bo ke mas
hende bo ta bisa, pero e biaheronan lo no keda. Nos ta
kanta na krioyo, nan ta nabegá nos awanan, nan lo no
keda. Hende pa hende bo ta bisa, pero paseantenan
pa niun kaminda, nan rònt mi isla e temporada akí, nos
tempu, nos temp’i Karnaval, nos tempu di bembe, nan
kontra kultura kontra e andá di bida kontra bientu i ola,
nan kontra hende kontra krioyisashon kontra mas hende
kontra nos grandesa, nan ku ta bin djis pa bot’i bela, nan
ku ke pasa nos bai, ku ke kap nos soñonan na ora di fiesta
rib’e isla akí, manera ta nada, biaheronan den nos mundu
ku nan mes spetakel, no por keda. Nan no tin niun dònder
kunes ku loke nan no tin niun dònder kunes, simplemente
nan no tin kunes, punto. Hende di botonan di bela, na
kolónan tropikal, lo no laga afrikanu kaluroso, multikulti
nan ke yama nos, ku kolónan karnavalesko, penetrá nan
lemanan kontr’i nos, nan no tin niun dònder kunes ku loke
nan no tin niun dònder kunes, nan no tin niun dònder kunes
ku hende si no ta di nan, punto. Ta yama hende payaso
tra’i nan lomba. Bo ta bisa kon ta posibel anto, kon por ta
ku paseantenan biahero, nabegando ku boto rondó di nos
isla, kon por ta ku ora nos fiesta i bista pa nos spiritunan
i nos bai den trans i kanta krioyo, kon por ta ku nèt nan
ku ta hende biahero, sivilisá, ta adorá nan mes sin
kultura i sin koló, un solo mas abou ku nan mes,
mientras nan ta parti dje istoria ku ta sende paga akí.
Bisa mi, kon nan por lucha kontra laman rònt nos isla,
kontentu di nan, sin nan sa ku nos ta aki di bèrdè mes.
Keubo, ta sina ku típikamente nan di nòrt no ta interesá
den nos fashi di sùit? Tene duele di nan, bo ta papia,
pasó sa nan no sa kiko nan ta hasi. Mas hende ta bonbiní,
bo ta bisa. Pero kon nos lo hasi k’e paseantenan ku no ke
mundu, algun di nan ta deklará; kos só nos gusta, nos ta
biaheronan for di nòrt, no lo tene nos mes fiestanan separá,
i nos tin nos mes moda di hasi kos separá, na lugánan chikí
manera esun akí, manera esun di boso. P’esei ami di, no ta
na pas nan ke drenta, basta furioso, i bo ta puntra kon nos
mester stima mientras konstantemente nan ta papia:
Nos manera ta mas santu ku esun di bosnan, mientras
konstantemente nan ta pensa: Laga nos kolonisá di nobo,
establesé efektividat bou di solo, nos mes mundu no pintá
i un universo strukturá ta mihó, ta nan ta papia, semper
nos lo krusa laman riba bark’i bela, nan ta bisa, ku mas
di nan mas libertat lo reina. Nan ta bisa ku nos islanan
konosé libertat pasó nan a lanta nos. Kon nos por stima
ora nan papia ku ta di biahe nan ta, ku nan ta bini pa siña
nos kon i tuma numa i bai. Kon? Nan lo no keda pa largu
tempu, separá mané nan so, nan ta hisa nan mes na laira
mas ayá for di nos, difísilmente nan lo keda, nan ta biba
riba boto ora nos ta balia den kaya, nan ta blo drei rònt
di nos lugá na ora dje festa krioyo. Zèildónan ku ta bin
pasa dushi, rònt i rònt, ta bisa ku nan no gusta nos boroto,
ta nan ta papia, nan ta paga pa keda un ratu, kiermen
nan tin e derechi pa zèil nan tempu bai, nan ta traha duru,
nan ta tehi di nos boroto, nan ta bisa. Ora di mula Matilda,
por ta nan por tolerá. Nada no a kambia no, mi ta kalkulá
manera semper kosnan ta. Kiko den nan a kambia, serio,
pa nos kiko a kambia bèrdaderamente. Pues, nos ta bisa
‘welkom’ na esnan ku ta bin hür boto di bela, nos ta bis’é
den idioma di nan tata, nos ta hasa ko’i tata pa nan, nos
ta alabá kas di nan tata, dilanti nan. Nos lo no para nan
nunka ora nan yama nos sokete na nos tera, ora ku nos
ta payaso tra’i nos lomba, nos ta balia den kaya banda
règt, na nos mes nos yamada. Nos no ta tribi kuestioná
nan regata, nada di nan, nos no tin e outoridat ei. Ta
solamente na malekon nos ta pasa band’i nan, mientras
nos ta plakiando nos diosnan, pasó nan for di nòrt ta bini
únikamente pa zèilmentu, nan no ta eksistí pasó den nan
mundu riba nos isla nos no ta eksistí. Simplemente nos
no t’aki. I bou di nos vestuarionan nos alma ta ulseroso,
mientras nos ta kana pasa nan. Esaki ta un ban topa otro,
un Karnaval den un Karnaval, parse eterno, nos no tin
e outoridat pa papia i para maldat kastiso. Biaheronan
for di nòrt, pa djis un ratu nan ta biba bou di nos, plaka
den nan saku i nan por bai bin numa ora nan ta haña
ta bon. Den nos nashon krioyo nan manera di hasi kos
ta bon pa tur, ki bo ta papia?! Asina nan ta nabegá ku
boto di bela, nos awanan, kaminda nos ta purba pa tin
pia riba tera, pa ta un nashon. No yama esaki aparthèit
no, laga esei pa mi. No yama nada Krioyo no, sin aparthèit
mi sa ku mi por! Yama e kos akí libertat pa esnan ku ta
biba tra’i muraya den nan paradèis, si bo tribi yama
e kos akí libertat. Kòrsou ta pa tur hende, asta pa hende
anti hende ku ta ankra pa un ratu riba e pais mesklá akí.
Papia duru, papia kla, malesa di biaheronan lo mi yama
e kos akí, sikopatia kolonial kontra di bientu i olanan
di nos tempu, kontra dje kurason di krioyidat. Kòrsou
ta pa tur, pa rekòrdá kara dje Amérikanan, nos ku ta
huntu mará di tur kaminda, Kòrsou ta pa tur ku ta tira
piedra kontra murayanan di strategia, esun dje kultura
separá, ku nos ta altamente apresiá. Esaki ta nos tempu
di Karnaval i bo ta bisa nos mester di turistanan, Kòrsou
ta pa tur. Bo ta bisa nos mester di nan, e gèng separá,
e turista siertu rasista. Kòrsou ta pa tur, bo ke papia.
Despues di tantu añanan kolonial, awó ku papiamentu
a bira idioma Krioyo bon di stèk, awó ku nos tin mas
k’e zèildónan djaleu, bisa mas direkshon ku mas don,
i sabiduria, i tesoronan den e tèmpel. Awó k’e zèildónan
ta bin akí ku pasashi barata, i nan ta keda bin, pa bende
nan spit riba tur, awó ku nan ta sinti nan mes priviligiá
asta, awó ku nan kaminda parse e kaminda p’e “Dutch
Caribbean“, awó ku nos ta puntra nada no, awó! Kos
lo kambia. Asina’ki lo no keda! E sieguedat di esnan
for dje parti nòrt di Ulanda lo pone un pais karibense
riba pia. E síndrome di separashon akí, tur e trepmentu
di ego oropeo riba olanan rondó di nos isla, durante
e temporada di aña den kua nos ta tur huntu, tur ten,
ora nos tur huntu ta selebrá Dios bistí na paganu, den
un Karnaval kongoatlétiko, e temporada di nos akí,
dje renasementu krioyo, temporada di union. Wak e kos
ku ta pasa riba olanan singular awó, stañerunan bayendo
laman, nan festividat tené religiosamente ora ritmo dje
isla por unifiká nos nashon di tur koló, esaki yama sikopatia
ulandes. Grandi ku chikí, riku, pober, gordo, flaku, dunadó
i tumadó i e katóliko, e bailarina di barika ku e hasidó
di brua, i esnan ku ta bati saka plaka, pretu i blanku i
blanku ku pretu, meskos ku den Nicolás su Sóngoro
cosongo, maske ta un biá nos tur ta huntu, i chinonan
i e kukinan maron, i esnan yamá brownies, stiktamente
ulandes kriá. I Libanesnan, i zòmbinan ku chèiba sólido
na man, i Haitianunan den poder dje Priye Ginen, nos
Orashon Áfrikanu. Nos tur ta bini huntu mientras otro
hende ta zèilu riba laman rònt nos isla kada bes, yama nos
porko orgiástiko. Nan ku no tin kunes k’e baile i e ritmo
i orashon i e kurason, i e pueblo, nan ku no ta ni interesá
kon, durante paradanan krioyo di Karnaval, nos ta preservá
union, nan ku ta zèilu rondó di nos, hasiendo nan mes kos.
Biaheronan turístiko pa niun kaminda, riba laman rònt
mi isla, nan ta menospresía abo ku mi, odia nos kantika
òf nan no ta sinti nada mes. Mientras nos ta bisa ku di
siertu hende nos ke mas. Nan mes ta papia pa nan mes:
Libertat nos tin den nos awanan tropikal, un biá mas.
Aki n’e lugá chikí di nos, kaminda hende di origen ulandes
desafortunadamente mester dil ku ‘nan’. No kansa bo kabes
ku afrikanunan, bin n’e lugá di bo mes, bin e paradèis di nos
mes ainda, zèilu nabegá den bo mes awa kayente, mientras
pretunan ta balia den kaya. ? Nos mester mas di nan bo di.
Dushi, t’aki nos sa ku bèrdat sa pika, tòg? Kos lo bòltu pronto.
Nan lo tin ku skombra nan mes poko, ta p’esei nan lo no keda.

-e poema ku su adaptashon na Krioyo ta di Kaitano Sarah

Yakumèinchi ta un miembro dje tribu di protestantnan blanku for di tempu kolonial riba e isla di Kòrsou. Shangri-La ta nifiká utopia, paraiso riba tera, ta un baye imaginativo den e novela antiguo di James Hilton. Fete ta un bembe, fiesta, festival, selebrashon. For di franses di antes, e palabra ta wordu basta uzá den nos Karibe, sigur durante e temporada di Kanaval. Krioyo ta mi idioma. Krioyo tambe ta nos kultura, un meskla potente manera semper mi sa bisa. Priye Ginen òf Orashon Afrikanu ta wòrdu kantá na Kwèyol, e idioma di Haiti. Laga e Priye Ginen zona na kuminsamentu di nos seremonianan Vudú! I Nicolás ta Nicolás Guillén di Kuba, e gran poeta krioyo ku a skibi entre otro e tomo Sóngoro cosongo.