MI KE YAMA AYÓ

Bo por a nota ku último tempu mi no ta skibi mashá riba mi blòg. Pensamentu i sirkumstanshanan ta pone ku mi tin ku para Ban Liber. Nada no a kambia, mi ta e poeta di semper, ku gusta pinta i studia metafísika. Pero blògdó, mi no sa. Momentu ku bo ripará ku bo ta bira muchu insistente, sin hende risibí bo eko, ora a yega pa korekshon. Komo poeta, ora bo ta kuminsá skibi di mas loke bo no ke skibi, muchu komentario, muchu krítika, bo ego ta den wega. Si, ora a yega p’e poeta akí kambia su rumbo. E momentu ku bo ta sinti ku skibimentu riba blòg ta bira un mester, kaminda ya kaba bo tin duda ku hende ta sinta warda riba bo blòg i bo vishon, ta tempu pa stòp. Mihó hinka aun mas tempu den arte. Mi no ta yamá, komo poeta Krioyo, pa ta un dje poko blògdónan na Papiamentu, mi tin ku skohe mi ta kere.

Na dos tres okashon mi a ekspresá mi duda ofer dje blòg akí, ofer di mi mes aserkamentu i esun di otronan pa ku literatura Krioyo komprometí di awe, e rumbo ku mester kue, e visionarionan ku nos komo artista mester ta pa yuda forma nashon. Pa loke ta toka blògmentu; despues di dosshen i piku artíkulo i dos tres esfuero pa hasi un k’e otro bon, mi a yega n’e krusada mes mes. Mi ta 100% komprometé na poesia, n’e gran mundu Krioyo i na Papiamentu, sin e rosea iritante dje instituto ulandes/oksidental riba mi koko. Pero mi no sa ku mi pueblo di awendia ta, ni e trupa di artistanan literario ku ta represent’é, mi no ta kere.

Mi ta bisa un biá mas: nos no ta kla pa esaki i na un banda mi ta haña laf ku mi ta laga e par di otro blògdónan na Papiamentu atras, pero ta un chòis personal i bon pensá. Tráfiko pa mi blòg no ta hopi, komentarionan ta tiki, otro poetanan ta ketu, e entusiasmu di mi mes hendenan no tei, ta tempu pa sigui. Si mi tabata tin tempu, lo m’a purba mas ratu k’e blòg akí. Simplemente bisá; bou dje tipo di sirkumstanshanan asina’kí, ami no tin’é. Podisé ta pasenshi mi falta, mi no sa. Echo ta ku mi no ke sigui blòg pa mi mes, mi no ta kere lo ta e desishon korekto, finalmente mi no ta kere den ego. Tin otro blògnan na Papiamentu ku tin muchu mas sentido pa keda na bida akiriba ku esun di mi.

Mi a pensa un otro manera pa mas literatura na Papiamentu akiriba, di poeta i skritornan Krioyo ku sa unda nan ta bai. Podisé un Blòg mas habrí pa tur por parti nan obra. Aworakí tempu ta bai laga mi i lo mi no por organisá esaki, podisé un otro si. Aparte di blògmentu, arte i otro proyektonan ta yama. Tabata un eksperensha úniko i milagroso, e gana i impulso di kompartí bo idea i speshalmente bo obranan sin kobra niun depchi. Dushi. Dushi i bon kos, pa su bon ‘’internèt’‘ ta keda un milager, un milager i un otro universo!

Humildemente mi ke yama ayó. Danki pa lesa. Den futuro lo mi ta bèk sigur, podisé bou di otro nòmber di artista, ku publikashon i tradukshonnan den revistanan literario internashonal. Pero pa awóraki, riba e manera akí, mi tin ku yama ayó, mi a purba, mi mensahe ta obvio mi ta kere. Por lo pronto Ban Liber lo keda aki komo un testimonio di un blòg Krioyo-Kosmopólito na Papiamentu ku un dia tabata eksistí. Mi ke yama danki na Jermain Ostiana dje tremendo blòg Triunfo di Sablika ku a inspira mi pa mi keda. Sigui les’é, e tin sentido. Tambe na Manuel, e strañeru blògdó ku stima Papiamentu ku su blòg SimanAkí, pa nos tur. Finalmente na Asyla ten Holt, pintor krioyo puru i blògdó yu di Kòrsou ku sa kon duna resistensha. Mi ke kaba ku un ekspreshon di mi mes, di basta aña pasá (na Inglés):

” Taking the work serious? Read poetry well, poets are warriors, our operation is unloosing words from the stiff monomania of how they were put somewhere. On paper I manumit what I think I am, or what you believe you have, into the beauty of nothingness. By means of traversing visionary pathways poets realize one in all self, which is the ultimate truth. So yes, I write Poetry, my work is about the accuracy of our freedom. In the end every genuine poet stands alone, not possessing anything that hinders the infinity of trueness.” 

-Obranan lo keda para por lo pronto. Ayó i Fòrsa Spiritual (Ashé)!

Kaitano Sarah -Mart 2013                                                                                                                                                                                                                                                              kaitanosarah@gmail.com